திருவள்ளுவர் நாள் விழா

அரசு பீங்கான் தொழில் நுட்பக் கல்லூரி விடுதி வளாகத்திலுள்ள திருவள்ளுவர் சிலைக்கு ஆண்டுதோறும் இதே நாளில் ஆர்வலர்களைத் திரட்டி மாலை அணிவித்து மரியாதை செய்து வருகிறார் பாவேந்தர்பேரவை இலக்கிய அமைப்பின் நிறுவனர் ஓவியர் மோகன். இரண்டு நாட்களுக்கு முன்பே பள்ளிக்கு வந்து தகவலைக்கூறி அவசியம் கலந்துகொள்ள வேண்டும் என அழைத்தார். இன்று காலையும் தொலைபேசில் நினைவூட்டினார். நானும் நண்பர் ரமேசுபாபுவும் சென்றோம். எதிர்பாராத விதமாக நிகழ்ச்சிக்குத் தலைமையேற்க என்னை அழைத்தார். வழக்கறிஞர்கள் சந்திரசேகரன், பூமாலை குமாரசாமி, அரசியல் கட்சி பிரமுகர்கள், அமிர்தராசு, சிவா, ஆனந்தபாரதி, ஓவிர்கள் ரகு, ராசேந்திரன், வேலு, மணிகண்டன் மற்றும் பலர் நிகழ்ச்சியில் பங்கேற்றனர். நகரிலிருந்து தொலைவில் சிலை அமைந்திருப்பதால் பலரால் இந்நிகழ்வில் கலந்துகொள்ள இயலவில்லை, எனவே நாம் ஒன்றிணைந்து நகரின் மையத்தில் ஒரு சிலை அமைக்க வேண்டும் என ஒவ்வொரு முறையும் கலந்துகொள்பவர்கள் பேசுவதுண்டு. ஆனால் அதோடு மறந்து விடுவோம். இந்தமுறை சிலை அமைக்கும் செலவுக்காக 1001 உருவாயைத் தருவதாக வழக்கறிஞர் சந்திரசேகரன் கூற பூமாலை சண்முகம் 5000 ரூ தருவதாக் கூற கூட்டத்திற்கு வந்திருந்த ஒவ்வொருவரும் போட்டி போட்டுக்கொண்டு தொகையை அறிவிக்க 15000 ரூ சேர்ந்தது. இதை வசூலித்து சிலை அமைத்துவிடலாம் என்ற நம்பிக்கை ஏற்பட்டுள்ளது.
நிகழ்ச்சியின் நிறைவில் அனைவருக்கும் சர்க்கரைப் பொங்கல் வழங்கப்பட்டது.

தை அய்ந்தாவது இதழ்

தை அய்ந்தாவது இதழ் வெளியாகியுள்ளது. ஆசிரியர்: கவிஞர் அறிவுமதி, நூலாக்கம் : கவிஞர் பழநிபாரதி, நூலழகு : ஆர்.சி.மதிராஜ், வெளியீடு : சாரல், 189, அபிபுல்லா சாலை, தியாகராயநகர், சென்னை- 600 017. arivumathi@hotmail.com பேச: 9940221800.

விற்பனை உரிமை : தமிழ் அலை, 1- காவலர் குறுந்தெரு, சைதாப்பேட்டை, சென்னை-600 015. tamilalai@gmail.com , பேச: 9786218777.

நூல் கிடைக்குமிடம் : தணல் பதிப்பகம், சென்னை- 14. பேச: 9445428375.

கவிதைகளோடு கவிஞர்களையும் அழகு செய்வதாக 160 பக்கங்களில் மிகச் சிறப்பாக இதழ் வந்துள்ளது. அண்ணன் அறிவுமதி அவர்களின் அழகுணர்வு இதழின் ஒவ்வொரு பக்கங்களிலும் மின்னுகிறது.

புதைந்த
உதிரக்கொடிகளின் மீது
பொழிந்த மழையில்
புத்துயிர்ப்பின் முதல் அடையாளமாய்
முளைத்துக்கொண்டிருக்கின்றன
பசும் புல்லும்
எம் சொல்லும்.

என்னும் இன்குலாப்பின் கவிதை அட்டையை அழகு செய்ய மலர்கிறது கவிதைத் தை

தையில் வந்த என் கவிதை இதோ.

ஆதி வாழ்க்கை

நுழைந்ததும்
குரைத்து வரவேற்கும்
நாய்
முற்றத்தில்

வரவேற்பறையில்
எலியின் வருகையை
எதிர்பார்த்துக் காத்திருக்கும்
பூனை

கூடு பின்னிக்கொண்டிருக்கும்
சிலந்திகளைத் துரத்தி
வேட்டையாடும்
பல்லிகள் நிறைந்த
கூடம்

கழிவு நீர்க் குழாய்
வழியாக உள்ளே வந்து
தானியங்களைத் தேடி
சமையலறையில் அலையும்
எலிகள்

அழுக்குத்துணிகளிடம்
அடைக்கலம் தேடி
படுக்கையறைக்கு வந்துவிடுகின்றன
கரப்பான் பூச்சிகள்

கழிவறை ஈரத்தில்
அடைந்து கிடக்கும்
தவளைகள் எழுப்பும்
ஒலி கேட்டு
அவ்வப்போது
வந்து போகின்றன
பாம்புகளும்

தோட்டத்து முக்கனிகளைப்
பதம் பார்க்கும்
குரங்குகள்

நகரத்தில்
அமைந்திருந்தாலும்
இயற்கையோடு இயைந்ததுதான்
எங்கள் வாழ்வும்.

இளவேனேல் பிறந்தநாள் விழா

என் மகன் இளவேனிலுக்கு இது 10 ஆவது பிறந்த நாள் விழா. பத்து வயது முடிந்து 11 வயது தொடங்குகிறது. என் அண்ணன் மகன் கார்க்கியும் அவன் நண்பன் ரெங்கனாதனும் பரிசுகளோடு வந்து பிறந்தநாள் விழாவில் கலந்து கொண்டனர். இளவேனில் என்ன சட்டை வேண்டும், என்ன இனிப்பு வேண்டும், கேக் எப்படி அமைய வேண்டும் என்பதையெல்லாம் முன்பே முடிவு செய்துவிட்டான்.அதன்படிதான் எல்லாம் நடந்தேறியது. குழந்தைகள் என்ன நினைக்கிறார்களோ அதை நிறைவேற்றுவதுதானே பெற்றோரின் வேலை. அந்த வகையில் இளவேனிலுக்கு இது மகிழ்ச்சியான பிறந்த நாளாகக் கழிந்தது. இன்று அவன் எதிர்பார்த்தபடி யாரும் அவனைத் திட்டவில்லை. ஒரு நாளாவது அவனுக்கு படிப்பைப் பற்றி நினைக்காமல் இருப்பதற்கு இந்த பிறந்தநாள் உதவியது. தினமும் பிறந்த நாளாக இருக்கக் கூடாதா?...
என்ற ஏக்கத்தோடு தூங்கிப் போனான்.

திரு.வி.க. விருது பெற்ற எழுத்தாளர் இமையம்

எழுத்தாளர் இமையத்தின் இலக்கியப் பங்களிப்பைப் போற்றும் வகையில் தமிழக அரசு அவருக்கு திரு.வி.க. விருது கொடுத்து மரியாதை செய்துள்ளது. வயதான காலத்தில் விருது கொடுப்பதைவிட இது போல் இளம் வயது எழுத்தாளர்களுக்கு கொடுக்கப்படும் விருதுகள் பயன் தரும்.

கடலூர் மாவட்டம் கழுதூரில் பிறந்த இமையத்தின் இயற்பெயர் அண்ணாமலை. பெற்றோர் வெங்கட்டன், சின்னம்மாள்.ஆசிரியராகப்பணியாற்றும் இமையம் இதுவரை மூன்று புதினங்களும் இரண்டு சிறுகதைத் தொகுப்புகளும் வெளியிட்டுள்ளார். 1994 இல் வெளியான கோவேறுகழுதைகள் தமிழின் முக்கியமான புதினங்களுள் ஒன்று. இது ஆங்கிலத்தில் மொழிபெயர்க்கப்பட்டுள்ளது. புதிரைவண்ணார் சமூக மக்களின் வாழ்க்கையைப் படம் பிடித்துக்காட்டும் இப்புதினம் பரவலாக பேசப்பட்டது, விவாதங்களுக்கு உள்ளானது.இவரின் நூல்கள் அனைத்தையும் க்ரியா பதிப்பகம் வெளியிட்டுள்ளது.

1999 இல் வெளிவந்த ஆறுமுகம் புதினம் கதா பதிப்பகத்தால் ஆங்கிலத்தில் மொழிபெயர்த்து 2006 ஆம் ஆண்டு வெளியிடப்பட்டது. மூன்றாவது புதினமான செடல் 2006 இல் வெளிவந்தது. மண்பாரம் சிறுகதைத் தொகுப்பு 2004 ஆம் ஆண்டும், வீடியோமாரியம்மன் சிறுகதைத் தொகுப்பு 2008 ஆம் ஆண்டும் வெளியாயின.

அக்னிஅக்சரா விருது, தமிழ்நாடு முற்போக்கு எழுத்தாளர் சங்க விருது, அமுதனடிகள் விருது ஆகிய விருதுகளைப் பெற்றுள்ளார். இந்திய அரசின் பண்பாட்டுத்துறை 2002 ஆம் ஆண்டு இளநிலை ஆய்வு நல்கை இவருக்கு வழங்கியுள்ளது.

விருத்தாசலத்தில் வசித்துவரும் இவரைத் தொடர்பு கொள்ள, இமையம், முத்தமிழ் தெரு, பெரியார் நகர் தெற்கு, விருத்தாசலம்-606 001, பேச : 9865417399, மின்மடல் : imayam.annamalai@gmail.com

நண்பர் இமையம் மேலும் சிறந்த படைப்புகளை வெளியிட்டு தமிழ் இலக்கியத்தை வளப்படுத்த வாழ்த்துவோம்.

அஞ்சலையம்மாள் சட்டமன்றத்தில் ஆற்றிய உரை

விடுதலைப் போராட்ட வீராங்கனை கடலூர் அஞ்சலையம்மாள் 24.05.1946 ஆம் நாள் சென்னை கோட்டையில் உழவர், நெசவாளர் பிரச்சனைகள் குறித்து ஆற்றிய உரை அவைக்குறிப்புகளில் பதிவாகியுள்ளது. அவரைப்பற்றி ஆய்வு செய்துள்ள கடலூர் ஆசிரியை விஜயலட்சுமி இக்குறிப்புகளை சட்டமன்ற அலுவலகத்தில் பெற்றுள்ளார். அவர் அக்குறிப்புகளை அஞ்சலையம்மாளின் மகன் திரு ஜெயவீரன் அவர்களிடம் கொடுத்திருந்தார் நான் திரு. ஜெயவீரன் அவர்களிடமிருந்து பெற்று ஆய்வாளர்களுக்குப் பயன்படும் என்பதால் இங்கே பட வடிவில் வெளியிடுகிறேன். இதற்கு உதவியவர் அஞ்சலையம்மாளின் மகன் வழிப் பெயரன் திரு. அருணகிரி இவர்கள் அனைவரின் ஒத்துழைப்பிற்கும் நன்றிகூற கடமைப் பட்டுள்ளேன்.

பூங்காக்களில் புத்தகம்

பூங்காக்களில் புத்தகம் என்ற திட்டத்தை நூலகத்துறை அறிமுகப்படுத்தியுள்ளது.அதன்படி விருத்தாசலம் பெரியார் நகர் பூங்காவில் பதிப்பாளர்களும் எழுத்தாளர்களும் விருத்தாசலம் கிளை நூலகரோடு ஊழியர்களும் பங்கேற்ற நிகழ்ச்சி 26-12-2009 இன்று காலை 11 மணிக்கு நடைபெற்றது.
நிகழ்ச்சியில் எழுத்தாளர் சபாநாயகம், பதிப்பாளர் மருதம் ராஜேந்திரன், கவிஞர் பட்டி செங்குட்டுவன், நானும் சில பள்ளி மாணவர்களோடு பொதுமக்களும் கலந்து கொணடனர். அ.க.பெருமாள் எழுதி மருதம் பதிப்பகம் வெளியிட்டுள்ள படிக்கக்கேட்ட கதைகள் நூலை எழுத்தாளர் சபாநாயகம் வழங்க நூலகர் பெற்றுக்கொண்டார்.எனது நூல்களும் காட்சிக்கு வைக்கப்பட்டன நிகழ்ச்சி சரியாக ஏற்பாடு செய்யப்படாமையால் திட்டத்தின் நோக்கம் நிறைவேறாமல் வெறும் சடங்காக மட்டுமே நிகழ்ந்தது.
நிகழ்வு

புதுவையில் ஒளி ஓவியப் பயிலரங்கு

புதுவை ஒளிப்படக்கலைஞர்கள் இணைந்து இளம்
ஒளி ஓவியர்களுக்கான ஒரு நாள் பயிலரங்கு
ஒன்றினை எக்சிகியூடிவ் இன் விடுதியில் ஏற்பாடு
செய்திருந்தனர். ஒளிப்படக் கலைஞர்கள்
முருகன், சரவணன், ராஜேஷ், சுரேஷ் ஆகியோர் மிகச்சிறப்பாக
நிகழ்ச்சியை ஒருங்கிணைத்து நடத்தினர். புகழ் பெற்ற ஒளிப்படக்கலைஞர்
நெய்வேலி ஜான்பாஸ்கோ டிஜிடல் கேமிராவில் தெரிந்துகொள்ள வேண்டிய
அடிப்படை நுணுக்கங்களைப் பயிற்றுவித்தார்
ஒளி ஓவியர் மோகன் படத்தை ஒளியால் மெருகூட்டுவதற்கான
நுட்பங்களைப் பயிற்றுவித்தார். ஒளிப்படக்கலையில் 40 ஆண்டு
அனுபவமுடைய மூத்த கலைஞர் ஆசிரியர் விவேகானந்தன்
நிகழ்ச்சியில் கலந்துகொண்டு சிறப்பித்தார்.
தமிழகத்தின் பல்வேறு ஊர்களிலிருந்து ஒளிப்படக் கலைஞர்கள்
25 பேர் கலந்துகொண்டனர். நானும் பார்வையாளனாகக் கலந்துகொண்டு
படம் பிடிப்பதற்கான சில நுட்பங்களைக் கற்று வந்தேன்.
ஈடுபாட்டு உணர்வோடு அனவரும் பங்கேற்று பயிலரங்கை வெற்றியடையச்
செய்தனர். புதுச்சேரி ஒளி ஓவிர்கள் மன்றம் என்ற பெயரில் தொடர்ந்து இயங்குவது
என முடிவெடுக்கப் பட்டது. ஒளிப்படப்போட்டிகள் நடத்துவது என்றும் முடிவுசெய்துள்ளனர்.
அவர்களின் முயற்சி வெற்றிபெற வாழ்த்துவோம்.