நம் நேரம் நம் கையில்

காலம் பொன்போன்றது கடமை கண் போன்றது என்பது நம் முதுமொழி. காலத்தைப் பொன்னைவிடவும் மேலானதாகக் கருதியதன் விளைவாகவே இந்த பொன்மொழி தோன்றியிருக்கவேண்டும். நாம் எந்த ஒரு பொருளை இழந்தாலும் அதனை மீண்டும் பெற்றுவிடலாம். ஆனால் நாம் இழந்த காலத்தை மீண்டும் பெற இயலாது. காலம் தவறாமை என்பது இன்றும் வாழ்க்கை நெறியாக உலகம் முழுவதும் பின்பற்றப்படுகிறது.

     எனவே மாணவர்கள் காலத்தின் அருமையை உணர்ந்து செயல்பட வேண்டுமெனில் நேரத்தை எப்படி செலவிடுவது எனத் திட்டமிட்டுக் கொள்ள பழக வேண்டும். அதற்கு நேர மேலாண்மை குறித்த தெளிவு அவசியம்.

     இப்போது தேர்வு நடைபெறும் நேரம் என்பதால்  நாம் நேரத்தை எவ்வாறு செலவிடலாம் என்பதைத் திட்டமிட்டுக்கொள்வது நல்லது. தேர்வுக்கு முன்னும் தேர்வு நேரத்திலும் எவ்வாறு நேரத்தை பகுத்து செல்விடவேண்டும் என்பதை நினைத்துப்பார்க்கவேண்டும்.

     தேர்வுக்கு முதல் நாள்:

·         நாளை எழுதப் போகும் தேர்வை கால அட்டவணையைப்பார்த்து உறுதிசெய்து கொள்ளவேண்டும்.

·         பாடம் முழுவதும் படிக்க நேரமிருக்காது எனவே கடினப்பகுதிகள் அல்லது படிக்காமல் விட்ட பகுதிகளை மட்டும் ஒரு முறை பார்க்கலாம்.

·         காலை 5 மணிக்கு எழும் வழக்கமுள்ளவர்கள் ஒவ்வொரு மணித்துளிக்காகவும் திட்டமிட வேண்டும்.

·         சாப்பிட, குளிக்க என நம் அன்றாட அடிப்படைத்தேவைகளுக்கான நேரத்தைக்கூட குறிப்பிட்ட அளவில் சரியாக செலவிடவேண்டும்.

·         பணத்தை எப்படி கணக்காக செல்விட்டு அன்றைய செலவை கணக்கெழுதி சரிபார்க்கிறோமோ அதுபோல் அவ்வப்போது நாம் திட்டமிட்டபடிதான் நேரம் செலவாகிறதா என சரிபார்க்கவேண்டும். நம் கணக்கு சரியாக இல்லை எனில் அவற்றை அப்போதே சரி செய்திடவேண்டும்.

·         இவாறு திட்டமிட்டால்தான் தேர்வு நேர பதற்றமோ பரபரப்போ ஏற்படாது.

·         நம் கடிகாரத்தை 10 நமிடம் அதிகமாக வைத்துக்கொள்ளவேண்டும் அது நம்மை கொஞ்சம் சுறுசுறுப்பாக்க உதவும்.

·         ஒவ்வொரு மணியிலும் நமக்கான உதிரி நேரம் இருப்பது போல் திட்டமிடவேண்டும். ஒரு பணியை 10 நிமிடங்களில் செய்திடலாம் என்றால் நாம் 15 நிமிடங்களை அதற்காக ஒதுக்கிடவேண்டும். நம் கையில் 5 நிமிடம் மீதம் இருந்தால் பதற்றமில்லாமல் செலவிடலாம்.

தேர்வு நாளன்று:

·         பள்ளிக்கு கிளம்பும் நேரத்தை அவரவர் சூழலுக்கு ஏற்ப திட்டமிடவேண்டும்.

·         உள்ளூர் பள்ளி எனில் காலை 8 மணிக்கு வீட்டிலிருந்து கிளம்பினால் போதும்.

·         வெளியூர் எனில் பயண நேரத்திற்கேற்ப கிளம்பலாம்.

·         பள்ளிப்பேருந்தில் பயணம் செய்பவர்களுக்கு எந்த சிக்கலும் இருக்காது. பொது போகுவரத்தைப் பயன்படுத்துபவர்கள் தேர்வு நாளன்று சொந்த வாகனத்தில் பெற்றோர் துணையோடு சென்றால் நேரத்தை மிச்சப்படுத்தலாம்.

தேர்வு அறையில்

·         தேர்வு அறையில் தேர்வு எழுதுவதற்கான நேரம் எவ்வாறு பகுக்கப்பட்டுள்ளது என்பதை துண்டறிக்கையாக வாயிலில் ஒட்டி வைத்திருப்பார்கள் அதன்படி வினாத்தாள் படிக்க தாள் முதல்பக்கத்தை சரிபார்க்க கையொப்பமிட என ஒவ்வொரு செயலுக்கும் நேரம் ஒதுக்கப்பட்டுள்ளது அவற்றை முறையாக பின்பற்றவேண்டும்.

·         விடை எழுதத்தொடங்கிய பிறகு அரை மணிநேரத்திற்கு ஒரு மணி ஒலிக்கும். அதற்கேற்ப நேரத்தைத்திட்டமிடுங்கள்.

·         மொத்தமுள்ள நேரத்தை வினாத்தாளிலுள்ள மதிப்பெண்களால் வகுத்துக்கொள்வது சிறந்த முறையாக இருக்கும்.

·         கடினாமான கணக்கோ மனப்பாடப்பகுதியோ உரிய நேரத்தில் நினைவுக்கு வரவில்லை எனில் அதை நினைத்துப்பார்ப்பதற்காக நேரத்தை வீணடிக்காமல் அடுத்த விடையை எழுதத்தொடங்கலாம்.பிறகு தானாக அது நினைவுக்கு வரும்.

·         100 மதிப்பெண்ணுக்கு 150 நிமிடங்கள் எனில் ஒரு மதிப்பெண்ணுக்கு ஒன்றரை நிமிடங்கள் என ஒதுக்கலாம். எழுதியதை சரிபார்க்கவேண்டுமெனில் ஒரு மதிப்பெண்ணுக்கு ஒரு நிமிடம் எனத்திட்டமிடலாம். இப்படி திட்டமிட்டால் சரிபார்ப்பதற்கு நேரமிருக்கும்.

நன்றி : சுட்டிவிகடன்

          

கானல் வரி கருத்தரங்கம் – 1 அறிவிப்பு

            கானல்வரி,கற்க அறக்கட்டளை, அகிலா பதிப்பகம் இணைந்து நடத்தவிருக்கும் முதல் கருத்தரங்கிற்கு தங்களை அழைப்பதில் மகிழ்கிறோம்.

2016 மேத்திங்கள் 22 ஆம் நாள் விருத்தாசலத்தில் நடைபெற உள்ள கருத்தரங்கின் மையத்தலைப்பு  “தெருக்கூத்து”.  இத்தலைப்பை ஒட்டி கீழ்க்கண்ட  தலைப்புகளில் ஆய்வுக்கட்டுரைகளை அனுப்பலாம்.

1.தெருக்கூத்தின் வரலாறு

2.தெருக்கூத்துப்பாடல்கள்

3.தெருக்கூத்து ஒப்பனைமுறைகள்

4. தெருக்கூத்து நடிகர்கள்

5. தெருக்கூத்து ஆசிரியர்கள்

6. தெருக்கூத்துக்கான கதைகள்

7. தெருக்கூத்து இசைக்கருவிகள்

8. தெருக்கூத்தில் கட்டியக்காரர் பணிகள்

9. தெருக்கூத்து நுட்பங்கள் / உத்திகள்

10. தெருக்கூத்தின் அறிவுசார் பயன்கள்

மேற்கண்ட தலைப்புகளிலும் இதுபோல் தெருக்கூத்து சார்ந்த வேறு தலைப்புகளிலும் ஆய்வுக்கட்டுரைகளை அனுப்பலாம்.

நாட்டுப்புறவியல் வல்லுநர் குழுவால் தேர்வு செய்யப்படும் கட்டுரைகள் நூலாக்கப்பட்டு கருத்தரங்க நாளன்று வெளியிடப்படும்.

கட்டுரை அனுப்புவோர் ஒருங்குறி எழுத்துருவில் (Unicode font)  மட்டுமே தட்டச்சு செய்து word document ஆக kaanalvari2016@gmail.com என்ற மின்னஞ்சல் முகவரிக்கு  கட்டுரையாளரின் முழு முகவரி மற்றும் தொலைபேசி எண்ணுடன் 30/03/2016 தேதிக்குள் அனுப்பிட வேண்டும்.

கானல் வரி:

ஒத்த சிந்தனையுடைய நாட்டுப்புறவியலாளர்கள், படைப்பாளர்கள் ஒன்று சேர்ந்து தொடங்கியுள்ள அமைப்பு. ஆண்டுக்கு ஒரு கருத்தரங்கு நடத்தி, அதில் அளிக்கப்படும் கட்டுரைகளை நூலாக வெளியிடுவது என்ற நோக்கத்தில் இந்த அமைப்பு தொடங்கப்பட்டுள்ளது.

கற்க:

விருத்தாசலத்தில் பிறந்து சிங்கப்பூரில் வாழ்ந்துவரும் கவிஞர் தியாக ரமேஷ் அவர்களால் தொடங்கப்பட்டுள்ள அறக்கட்டளை. சிறந்த நாட்டுப்புற கலைஞர்களைத் தேர்ந்தெடுத்து அவர்களுக்கு விருது வழங்கி ரூ.10000/- பண முடிப்பு வழங்கி சிறப்பு செய்வது எனத்திட்டமிட்டுள்ளார்.

அகிலா பதிப்பகம்:

திரு. நரி அரி கிருஷ்ணமூர்த்தி அவர்களால் தொடங்கப்பட்டு சென்னையில் இயங்கி வரும் பதிப்பகம். கருத்தரங்கக் கட்டுரைகளை நூலாக வெளியிட இசைவளித்துள்ளார்.

கருத்தரங்க அமைப்பு:

  கருத்தரங்க நாளில் காலையில் கருத்தரங்கமும் மாலையில் கலைஞர்களுக்கு விருது வழங்கும் நிகழ்வும் நடைபெறும். கருத்தரங்கில் கலந்துகொண்டு கட்டுரை வழங்குபவர்களுக்கு நினைவுப்பரிசு, சான்றிதழ், கருத்தரங்கில் வெளியிடப்படும் நூல் ஆகியன வழங்கப்படும். கருத்தரங்கில் கலந்துகொள்ள பதிவுக்கட்டணம் எதுவும் இல்லை.

கானல்வரிக் குழு:

முனைவர் எழிலவன்

முனைவர் பல்லவி குமார்

முனைவர் இரத்தின புகழேந்தி

முனைவர் நவஜோதி

முனைவர் செந்தில்குமார்

திருமதி வெற்றிச்செல்வி

ஓவியர் திரு.கோவிந்தன்

கவிஞர் தியாக ரமேஷ்

திரு ந.இரமேஷ்பாபு

திரு. ரொசாரியோ

தொடர்பு முகவரி:

இரத்தின புகழேந்தி

18, தங்கம் நகர்

பூதாமுர்

விருத்தாசலம் – 606001

கைபேசி:9944852295

முக நூல் கவிதைகள் 13

1.குட்டி வானத்தை
பொருட் காட்சியில்
வாங்கியதோடு
படுக்கையறையின்
மேற்கூறையாக்கி
பலஆண்டுகளாயிற்று

ஒவ்வொரு இரவிலும்
எங்களைக்காண
பிறைநிலாவும்
விண்மீன்களும்
கோள்களும்
நீல்ஆம்ஸ்ட்ராங்கும்
வந்தனர்.

அழுக்கான
வானத்துக்கு
வெள்ளையடிக்கும்
நாளில்
தென்னை விளக்குமாற்றின்
தீண்டுதலில்
உதிர்ந்தன 
விண்மீன்களும்

தரையில் கிடந்த
நிலவையும்
குப்பைத் தொட்டியில்
போட்டாயிற்று

நிலா பார்க்காமல்
உறங்குவது
எப்படி?

எங்காவது
பொருட்காட்சி
நடக்கிறதா
சொல்லுங்களேன்.

2. ஒரு புளியமரம்
குழம்புக்கு 
புளி மட்டும் தருவதில்லை

குழந்தைகள்
ஊஞ்சலாட
தோள் மட்டும் தருவதில்லை

கல்லெறிந்த
சிறுவருக்கு
பிஞ்சுகளை உதிர்ப்பது
மட்டுமல்ல

தன் தழைகளை
மருந்தாகத் தருவது
மட்டுமல்ல

உயிர்நீத்த பின்
உரலாவது மட்டுமல்ல

எங்களுக்கு 
வகுப்பறையாகவும்தான்

அதன் வயிற்றில்
ஆணியைச்
செருகி
கரும்பலகையைத்
தூக்கிலிடுவோம்

கைகளாய் நீளும்
அதன் வேர்
முடிச்சில்
சாக்பீஸ் கொடுக்க

எங்களை
அமர்த்தி
பாடம் நடத்தத்
தொடங்குவார்
புளியமர வாத்தியார்.

3. நாம் பிள்ளைப் பருவத்தில்
துள்ளி விளையாடியதை
நினைவூட்டுகின்றன
இருசக்கர ஊர்தியினடியில்
நழுவும்
மழைக்கால
சாலைகள்

4. நடக்கச் சென்றவனை
ஓட வைக்கிறது
மழை.

5.மாணவர் கற்றுக் கொடுக்கிறார்
ஆசிரியருக்கு
கார் ஓட்டுவதற்கு

6. வாரக் கடைசியைக்
கொண்டாடுவோம்
மாதக் கடைசியில்
திண்டாடுவோம்.

7. ஊர்திச் சக்கரங்களின்
எண்ணிக்கையிலும்
வீட்டு விலங்குகளின்
விலையிலும்
உயர்ந்துகொண்டிருக்கிறது
தமிழரின் வாழ்க்கைத் தரம்.

8. டியோடரண்ட்
பூசாத எழுத்தின்
வியர்வை நெடியை
சகித்துக்கொள்வோமாக.

9. சொல்லுக்கும்
செயலுக்கும்
இடையில்
ஏன்
வெளி

அதுவும்
இவ்வளவு
அகலமாஅக!

10. இது 
எந்த கடைவீதியிலும்
கிடைக்காது
இலக்கியவான்களுக்கு
தேவைப்படலாம்

சொற்களை சலித்தெடுக்க

சோதிக்க விரும்பினால்
மிஞ்சுவது 
ஒற்றைச் சொல் மட்டுமே

எழுதுவோமா
வாழ்நாள் முழுவதும்
அந்த ஒற்றைச்சொல்
இலக்கியத்தை!

11. முன் தயாரிப்பின்றி
உள்ளே சென்ற
உதயநிதியை
செல்லக்குட்டிகள்
சந்தானமாக்கி
வெளியேற்றுகின்றனர்

12. நேர்க்கோட்டுப் பாதையில்
சென்றுகொண்டிருக்கும்
போது
அதன் சாய்வை 
மனம் நினைக்க
எக்சும் தெரியாமல்
ஒய்யும் தெரியாமல்
ஆயத் தொலை வடிவியலாய்
அச்சுறுத்துகிறது
வாழ்க்கை.

13. கவிதைக்கா
பொய்
அழகு

கவிதைக்கு
பொய்யா
அழகு

கவிதைக்கு
பொய்
அழகா?