நாட்டுப்புற இலக்கியம் அறிவோம்

சுட்டிவிகடன் வழங்கும் சுட்டித்தமிழ்.வானொலியில் நாட்டுப்புற இலக்கியம் அறிவோம் என்னும் தலைப்பில் டிசம்பர் 1 முதல் 15 வரை தினம் ஒரு சுவாரசியமான தகவல்களைத் தருகிறார் நாட்டுப்புறவியலாளர் முனைவர் இரத்தின புகழேந்தி.

தாலாட்டுப்பாடல்கள், விளையாட்டுப்பாடல்கள் நாட்டுப்புறக் கதைகள், பழமொழிகள், விடுகதைகள், நகைப்புகள் என குவிந்துகிடக்கும் நட்டுப்புற இலக்கியங்கள் பற்றி கேட்க 044 66802905 என்ற எண்ணைத் தொடர்பு கொள்ளுங்கள். சாதாரணக் கட்டணமே.

மலேசியாவில் 10ஆம் உலகத் தமிழாசிரியர் மாநாடு

முதல் உலகத் தமிழாசிரியர் மாநாடு சிங்கப்பூர் தமிழாசிரியர் சங்கத்தின் ஏற்பாட்டில், 1992-ஆம் ஆண்டில் சிங்கப்பூரில் நடைபெற்றது.  இதுவரை ஒன்பது உலகத் தமிழாசிரியர் மாநாடுகள் சிங்கப்பூர், மலேசியா, இந்தியா, மொரிசியசு, தென்னாப்பிரிக்கா ஆகிய நாடுகளில் சிறப்பாக நடந்தேறியுள்ளன.  பத்தாம் உலகத் தமிழாசிரியர் மாநாடு 2013 ஆம் ஆண்டு மலேசிய நாட்டின் தலைநகர் கோலாலம்பூரில் மிகச்சிறப்பாக நடைபெறத் திட்டமிடப்பட்டுள்ளது. மாநாட்டுக்குத் தமிழ்க்கல்வி குறித்த கட்டுரைகள் வரவேற்கப்படுகின்றன.


மாநாட்டின் நோக்கம்

1. தமிழ் கற்றல் கற்பித்தல் ஆகியவற்றில் மேம்பாடு காணத் திட்டமிடுதல்.

2. தமிழ்மொழி கற்றல் கற்பித்தலில் புதிய அணுகுமுறைகள், தகவல் தொடர்பு தொழில்நுட்ப வளமைகள் ஆகியவற்றைப் பயன்படுத்தும் வழிவகைகளை ஆராய்தல்.

3. உலகத் தமிழாசிரியர்களிடையே தமிழ் கற்றல் கற்பித்தல் தொடர்பான கருத்துப் பரிமாற்றங்களும் பகிர்வுகளும் நிகழ வகை செய்தல்.

4. பல நாடுகளைச் சேர்ந்த தமிழாசிரியர்களிடையே அணுக்கத் தொடர்பும் நிபுணத்துவ ஒத்துழைப்பும் ஏற்பட வழிவகுத்தல்.


Objectives of the Conference

1.To plan for developments in the teaching and learning of Tamil Language.

2.To explore the use of innovative approaches, and Information and Communication Technology resources for the teaching and learning of Tamil Language.

3.To facilitate the exchange  of views and promote sharing of ideas among Tamil Language teachers from around the world.

4. To promote networking and professional collaboration between Tamil Language educationist from various countries.


ஆய்வுக் கட்டுரைகள்


கட்டுரைகள் 20 நிமிடங்களுக்குள் படைக்கப்படும் வண்ணம் அமைந்திருக்க வேண்டும்.

ஆய்வுக் கட்டுரையின் சுருக்கம் 120 சொற்களுக்குள் அமைதல் வேண்டும்.
ஒருங்குறி (Unicode) முறையில் தட்டச்சு செய்து 15.12.2012ஆம் நாளுக்குள் மாநாட்டுக் குழுவினருக்குக் கிடைக்குமாறு அனுப்பி வைக்கவும்.


கட்டுரை தேர்வுக்குழுவின் முடிவுகள் சம்பந்தப்பட்ட பேராளர்களுக்கு 15.01.2013ஆம் நாளுக்குள் தெரிவிக்கப்படும்.
முழு வடிவம் கொண்ட ஆய்வுக்கட்டுரையைத் தட்டச்சு செய்து 28.02.2013 தேதிக்குள் மாநாட்டுக் குழுவினருக்குக் கிடைக்குமாறு அனுப்பி வைக்கவும்.
பின்வரும் தலைப்புகளைத் தழுவியமைந்த கட்டுரைகள் பெரிதும் வரவேற்கப்படுகின்றன

1. கற்றல் கற்பித்தலில் புதிய அணுகுமுறைகள்
       - ஊடகங்களின் தாக்கம்
      - தகவல் தொழில்நுட்பப் பயன்பாடு
      - புதுக்கோட்பாடுகள் , Language Teaching Learning Methods ( LTLM )

2. தமிழை இரண்டாம் மொழியாகப் பயில்வோர்க்கான கற்றல் கற்பித்தல் நடவடிக்கைகள்

3. பிறமொழி மாணவர்கள் தமிழை எளிமையாக கற்றுக் கொள்வதற்கான பயிற்று முறைகள்/நடவடிக்கைகள்

4. புலம்பெயர்ந்த நாடுகளில்/சூழலில் தமிழ்க் கல்வி

5. பண்பாட்டு விழுமியங்களைப் பேணுவதில் தமிழ்க் கல்வியின் பங்கும் பணியும்

6. தமிழ்மொழி கற்றல் கற்பித்தல் மதீப்பீட்டில் புதிய அணுகுமுறை

7. தமிழ்மொழிப் பயன்பாட்டில் கருத்தாடல் திறன் வளர்த்தல்

கட்டுரைகளைப் பின்வரும் மின்னஞ்சல் முகவரிக்கு அனுப்பி வைக்கவும்
Email : mail@worldtamilteachersconf.org

Contact Address:

10 th World Tamil Teachers Conference
C/O Department of Malaysian Languages & Applied Linguistics,Faculty of Languages and Linguistics
University of Malaya,
50603,Kuala Lumpur

Contact Details:
Chairman: 03-79673142
Secretary: 03-87331590
Tel: 603-7772 1 714
Fax: 603-7967 3 142

 http://www.worldtamilteachersconf.org/default.aspx

நன்றி :http://muelangovan.blogspot.in/2012/11/10.html

சபர்மதி ஆற்றங்கரையில்..

                                            காந்தி ஆசிரம நுழைவாயில்

                                          காந்தி ஆசிரமம் முதன்மைக் கட்டடம்

                                                            சிறுவர்களுடன் காந்தி

                                                     சபர்மதி ஆர்ர்ங்கரையில்

                                     கை ராட்டையில் நூல் நூற்க முயற்சி                                                                                                                                                                                                                                                                                                                                                                                                                                                                                                            அனைவருக்கும் இடைநிலைக்கல்வித்திட்டத்தில் ஆசிரியர்களை கல்விச்சுற்றுலா அழைத்துச்சென்றனர்.அதில் மும்பை அகமதாபாத் செல்லும் வாய்ப்பு கிடைத்தது. அகமதாபாத் நகரில் சபர்மதி ஆற்றங்கரையில் அமைந்துள்ள காந்தி ஆசிரமம் சென்றோம். அவரின் பல நினைவுகள் காட்சிப்படுத்தப்பட்டுள்ளன. அனைத்திற்கும் மேலாக அந்த இடம் அனைவரையும் கவரும் வகையில் அமைந்துள்ளது. காந்தி சிறப்பானதொரு இடத்தைத்தான் தேர்வு செய்துள்ளார்.விடுதலைப்போர் குறித்த முக்கிய முடிவுகள் பல அங்குதான் எடுக்கப்பத்துள்ளன. அவரின் அறை மூடிவைக்கப்பட்டுள்ளது. நம் நாட்டு மக்களின் மீது அவ்வளவு நம்பிக்கை. அவர்பயன்படுத்திய மரப்பொருள்களும் கை ராட்டையும் அங்கு உள்ளன. நூலகம் ஒன்றும் உள்ளது காந்தியின் அனித்து நூல்களும் அங்கு விற்கப்படுகின்றன. பலவற்றை வணிகமாக்கிவிட்டனர் அங்கு. நீண்ட நாட்களாக்ப்பார்க்க எண்ணிய இடம் இப்போதுதான் வாய்த்தது அதுவும் அரசாங்கத்தின் புண்ணியத்தில்.விடுதலைப்போராட்ட்வீரர் கடலூர் அஞ்சலையம்மாளின் மகள் லீலாவதி என்கிற அம்மாக்கண்ணு இங்குதான் வளர்ந்தாராம். காந்தி அவரைச் சிறு வயதில் தமிழ்கத்திலிருந்து அழைத்து வந்தார் என அவரின் குடும்பத்தினர் சொல்லக் கேட்டிருக்கிறேன். காந்தியுடனிருக்கும் குழந்தைகளில் அவர் எந்த குழந்தையோ.  

புதிய மதிப்பீட்டு முறை

கல்வித்துறையில் ஒரு அமைதிப்புரட்சி புதிய மதிப்பீட்டு முறை மூலம் ஏற்பட்டிருக்கிறது. அனாலும் இது இன்னும் செழுமைப்படுத்தப்படவேண்டும் இது குறித்து சுட்டி விகடன் கவனம் செலுத்தி வருகிறது அதற்கு முன்னோட்டமாக ஜூனியர் விகடனில் ஒரு கட்டுரை வெளியிட்டுள்ளனர் அதில் அடியேனின் சில எளிய கருத்துகளை வெளியிட்டுள்ளனர் அதனை நண்பர்களோடு பகிர்ந்து கொள்ளவே இந்த இடுகை. இது குறித்த மேலும் சில தகவல்கள் அடுத்தடுத்த இடுகைகளில்...

விருத்தாசலம் பெரியார் நகரில் கழிவுநீர் சாலையில் வழிந்தோடும் அவலம்.

விருத்தாசலம் நகராட்சியில் ஒரு முக்கிய புற நகர் பெரியார் நகர் ,நகரத்தின் முக்கிய நபர்களில் பலர் இந்த நகரில்தான் வசிக்கின்றனர். நகராட்சிக்கு அதிக வருமானம் ஈட்டித்தருவதும் இந்த பெரியார் நகர்தான். இங்குதான் இந்த அவலம். பூதாமூர் துணைமின் நிலையம் பின்புறம் அமைந்துள்ளது தங்கம் நகர்,இது பெரியார் நகரின் விரிவாக்கம். இந்நகரில் அமைந்துள்ள முதன்மைச் சாலை, சிதம்பரம் சாலையையும் கடலூர் சாலையையும் இணைக்கும் முக்கிய சாலையாகும். இச்சாலையில் மேல்நிலைப்பள்ளி அமைந்துள்ளது. மின்கட்டணம் செலுத்தும் மக்கள் அனைவரும் இச்சாலையைத்தான் பயன்படுத்துகின்றனர். பல பள்ளி வாகனங்கள் தினமும் இச்சாலை வழியே செல்கின்றன. பள்ளி கல்லூரி செல்லும் மாணவர்கள் அரசு அலுவலகங்களுக்கு செல்பவர்கள் என ஆயிரக்கணக்கான மக்கள் இச்சாலையை தினமும் பயன்படுத்துகின்றனர். இச்சாலைக்குத் தேவைப்படும் கூடுதல் இடத்தை 21.09.2010 அன்று முறையாக நகராட்சிக்கு தானமளித்து பத்திரப் பதிவு செய்துகொடுக்கப்பட்டது. இது பொதுமக்கள், குடியிருப்போர் நலச்சங்க பிரதிநிதிகள்,நகராட்சி ஆணையர், நகராட்சி அலுவலர்கள் ஆகியோரின் கூட்டு முயற்சியால் நடைபெற்றது. அதன் பிறகு சாலை விரிவக்கம் செய்யப்பட்டு இரண்டு ஆண்டுகளுக்கு மேலாகியும் சாலை ஓரத்தில் கழிவுநீர் கால்வாய் அமைக்கப்படவில்லை. அதனால் கழிவு நீர் சாலையில் வழிந்தோடுகிறது.அதில் செல்லும் வாகனங்கள் கழிவு நீரை, நடந்து செல்வோர் மீது  பீய்ச்சியடித்து நாள்தோறும் மக்களை கழிவுந்நீர்க் குளியலுக்கு ஆளாக்குகின்றன. மேலும் கழிவுநீர் செல்ல வழியில்லாமல் தேங்கி நிற்பதால் கொசுக்கள் அதிக அளவில் உற்பத்தியாகி நகரில் தொற்று நோய் பரவும் அபாய நிலை ஏற்பட்டுள்ளது. இது குறித்து நகர்மன்றத்தலைவரிடம் பல முறை சொல்லியும் இது வரை எந்த நடவடிக்கையும் இல்லை. என்னதான் நடக்கிறது நகராட்சியில். இதற்கு விடிவுகாலமே இல்லையா? இன்னும் அடிப்படை வ்சதிகளைக்கூட நிறைவேற்ற இயலாத நிர்வாகமாகத்தான் இருக்கிறது விருத்தாசலம் நகராட்சி. வருமானத்திற்கு ஒன்றும் குறைவில்லை.

விடுதலைப் போராட்ட வீரர் க.ரா.ஜமதக்னி

1903-ஆம் ஆண்டு ஏப்ரல் 15-ஆம் தேதி வட ஆர்க்காடு மாவட்டத்தில் உள்ள கடப்பேரி என்னும் கிராமத்தில், ராகவன்-முனியம்மாள் இணையருக்கு மகனாகப் பிறந்தவர். வாலாஜா அருகிலிருந்த கிராமத்துப் பள்ளியில் ஆரம்பக் கல்வியைப் பயின்றார். வேலூர், ஊரிஸ் கல்லூரியில் கல்லூரிக் கல்வியை 1926-இல் முடித்து, சென்னைப் பல்கலைக்கழகத்தின் இடைநிலை கலையியல் பட்டம் பெற்றார்.
 ÷பள்ளி மாணவராக இருந்த காலத்திலிருந்தே விடுதலைப் போராட்டத்தில் ஆர்வம் கொண்டிருந்த ஜமதக்னிக்கு, ஜாலியன் வாலாபாக் படுகொலை இந்தியா முழுவதும் ஏற்படுத்திய அதிர்வலைகள் பெரும் தாக்கத்தை ஏற்படுத்தியது. இந்த உணர்வின் தாக்கத்தால், காங்கிரஸ் இயக்கத்தின் மீது தீவிர பற்றுகொண்டார்.
 ÷கல்லூரி படிப்பை முடித்தவுடன் காங்கிரஸ் இயக்கத்தில் தன்னை ஈடுபடுத்திக் கொண்டார். அப்போது வேலூர் கோட்டையின் மீது கல்வீசி வன்முறையில் ஈடுபட்டதற்காக பிரிட்டிஷ் காவல் துறை அவரை 1926-ஆம் ஆண்டு முதன் முறையாகக் கைதுசெய்து, ஆறுமாதம் கடுங்காவல் தண்டனை விதித்தது.
 ÷விடுதலைப் போராட்ட வீரர் ஆக்கூர் அனந்தாச்சாரியார் 1968-இல் எழுதி வெளியிட்ட "அரசியல் நினைவு அலைகள்' என்ற நூலில், நீலன் சிலை அகற்றும் போராட்டத்தில் ஜமதக்னி எவ்வளவு துடிப்போடு செயல்பட்டார் என்பதை விளக்கியுள்ளார்.
 ÷இந்தப் போராட்டத்தில் கைது செய்யப்பட்ட ஜமதக்னிக்கு பிரிட்டிஷ் அரசு ஓராண்டு ஒரு மாதம் சிறைத் தண்டனை வழங்கியது. சிறையில் இருந்து விடுதலை அடைந்த ஜமதக்னியை, 1928-இல் பிரிட்டிஷ் அரசு ராஜ துரோக குற்றத்தைப் பொய்யாகச் சுமத்தி ஓராண்டு சிறைத் தண்டனை வழங்கி லாகூர் சிறையில் அடைத்தது.
 ÷சிறையில் இருந்து வெளிவந்த ஜமதக்னி தொடர்ந்து பிரிட்டிஷ் எதிர்ப்புப் பிரசாரத்தை மேற்கொண்டார். உப்பு சத்தியாகிரகத்தில் பங்குபெற்று, ஓராண்டு சிறைத் தண்டனையைப் பெற்றார்.
 ÷இக்காலக்கட்டத்தில்தான் சிறையில் இருந்த பொதுவுடைமைச் சிற்பி சிங்காரவேலரை முதன்முதலாக சந்தித்தார். ""சிங்காரவேலரோ தனக்கு தரப்பட்ட மாமிச உணவை எனது வயிற்றுப் பசிக்கு அன்புடன் அளித்தார். அறிவுப் பசிக்கோ மார்க்சிய உணவை அளித்தார். இந்தப் பயிற்சியே மார்க்சிய நூல்களை முறையாகக் கற்கும் பக்குவத்தை எனக்கு அளித்தது. சிறையில் இருந்த மற்ற தலைவர்களுக்குப் பிற்காலத்தில் மார்க்சிய வகுப்புகளை எடுப்பதற்கு வழிவகுத்தது. "மூலதனம்', "மிகை மதிப்பு' நூல்களைத் தமிழில் முழுமையாக மொழியாக்கம் செய்வதற்கு எனக்குப் பெரிதும் உதவியது'' என்று கூறியுள்ளார் ஜமதக்னி.
 ÷சிறையில் இருந்து வெளிவந்த சில மாதங்களிலேயே சட்டமறுப்பு இயக்கத்தில் ஈடுபட்டு, ஓராண்டு சிறைத்தண்டனைப் பெற்று, வேலூர் சிறையில் அடைக்கப்பட்டார். 1939-இல் இந்திய பாதுகாப்பு விதியின்படி கைது செய்யப்பட்டு இரண்டாண்டுகள் வேலூர், கோவை சிறைகளில் அடைக்கப்பட்டார். அப்போது பெருந்தலைவர் காமராஜரும் இவரும் பக்கத்து பக்கத்து அறைகளில் இருந்தனர். 1975 ஜூன் மாதத்தில் தலைவர் காமராஜரை அவரது இல்லத்தில் சந்தித்தபோது, காமராஜர், ""ஜமதக்னிதான் எனக்கு மார்க்சியம் என்ன என்பதைக் கற்றுக் கொடுத்த ஆசிரியர்'' என்று நினைவுகூர்ந்துள்ளார்.
 ÷மீண்டும் இந்தியப் பாதுகாப்புச் சட்டப்படி கைது செய்யப்பட்டு வேலூர் சிறையில் இருந்தார். அப்போது சம்ஸ்கிருதம், இந்தி, மலையாளம், தெலுங்கு போன்ற பல மொழிகளைக் கற்றார். இதுகுறித்து ஜமதக்னி குறிப்பிடுகையில், ""மூதறிஞர் ராஜாஜி, சிங்காரவேலர், டாக்டர் இராசன், பட்டாபி சீத்தாராமையா, பலுசு சாம்பமூர்த்தி, ஈ.எம்.எஸ். நம்பூதிபாட், ஏ.கே.கோபாலன், கொண்டா வெங்கடசுப்பையா, காளா வெங்கட்ராம், அன்னபூர்ணய்யா ஆகியோருடன் சிறையில் இருந்தமையால் பல மொழிகளையும் கற்பதற்குத் தனக்கு வாய்ப்பு ஏற்பட்டது'' என்று அடிக்க நினைவுகூர்வார்.
 ÷சம்ஸ்கிருத மொழியை முழுமையாகக் கற்றுணர்ந்த அறிஞர்களில் ஜமதக்னியும் ஒருவர். காளிதாசரின் மேகசந்தேசம், ரகுவம்சம் ஆகிய நூல்களைத் தமிழில் கொண்டு வந்த பெருமைக்குரியவர். புகழ்பெற்ற ஜெய்சங்கர் பிரசாத் இந்தியில் எழுதியுள்ள "காமாயிணி' என்னும் காப்பியத்தை, தமிழில் "காமன் மகள்' என்று மொழிபெயர்த்து வழங்கினார். விடுதலைப் போராட்டக் காலத்தில் தலைமறைவாய் வாழ்ந்த தனக்கும், தனது தோழர்களுக்கும் பணம் தேவைப்பட்ட போது, திருமுருகாற்றுப்படை, கந்தரலங்காரம், கந்தரனுபூதி, குமரேச சதகம் ஆகிய நூல்களுக்கு விளக்க உரை எழுதி வருவாய் ஈட்டினார்.
 ÷1938-இல் சோஷலிஸ்ட் கட்சி உருவானபோது சிங்காரவேலர், ஜீவானந்தம் ஆகியோருடன் இணைந்து இக்கட்சி தமிழகத்தில் உருவாவதற்குப் பெரிதும் பாடுபட்டார். பின்னர் இந்திய கம்யூனிஸ்ட் கட்சி உருவானதும் அதன் நிறுவன உறுப்பினரானார். அக்கட்சியின் வட ஆர்க்காடு மாவட்டத்தின் முதல் செயலாளராகப் பணியாற்றினார். 1938-ஆம் ஆண்டில் மார்க்சியம், நீ ஏன் சோஷலிஸ்ட் ஆனாய்?, இந்தியாவில் சோஷலிசம் போன்ற நூல்களையும் எழுதி வெளியிட்டார். இதற்காக சிறைத் தண்டனையையும் பெற்றார். கம்பனுடைய சில முக்கிய பாடல்களைத் தமிழிலிருந்து இந்தியில் மொழிபெயர்த்து வழங்கியுள்ளார்.
 ÷1947-இல் இந்தியா விடுதலை பெற்றபின், ஜமதக்னி தனது வாழ்நாளை எழுத்து, இலக்கியப் பணிகளுக்கு செலவிட்டார்.
 ÷ஜமதக்னியின் குடும்ப வாழ்க்கை சிறைத் தொடர்பு கொண்டதுதான். கடலூர் மாவட்டத்தில் சுதந்திரப் போராட்ட வீராங்கனை அஞ்சலை அம்மாளை சிறையில்தான் சந்தித்தார். அவரின் மகள்தான் அம்மாக்கண்ணு. இந்த அம்மாக்கண்ணுவின் பெயரை காந்தியடிகள் லீலாவதி என மாற்றினார். பின்னாளில் அஞ்சலையம்மாள் சட்டமன்ற உறுப்பினராகவும் ஆனார். அஞ்சலை அம்மையாருக்கு அளித்த வாக்குப்படி விடுதலைப் போராட்ட வீரர் லீலாவதியை 1942-ஆம் ஆண்டு பதிவு திருமணம் செய்து கொண்டார். இவர்களுக்கு ஒரு மகனும் (சிவாஜி), இரு மகள்களும் (கிருபா, சாந்தி) பிறந்தனர் (கட்டுரையாளர் பேராசிரியர் மு.நாகநாதனின் மனைவிதான் முனைவர் சாந்தி). மகன் சிவாஜி, மகள் கிருபா ஆகிய இருவரும் மறைந்து விட்டனர்.
 ÷1981-இல் தனது பயணத்தை முடித்துக் கொண்டார் ஜமதக்னி. அவரின் பல படைப்புகள் இன்னும் வெளியிட வேண்டியுள்ளன. ஜமதக்னியின் சிந்தனைப் பயணம் தொடர்கிறது...
 ÷1998-ஆம் ஆண்டு க.ரா.ஜமதக்னி மொழிபெயர்த்த மூலதனம் மற்றும் மிகைமதிப்பு நூல்களுக்கு தமிழ்நாடு அரசு ரூபாய் ஐந்து லட்சம் உதவி வழங்கிச் சிறப்பித்தது.

நன்றி : பேராசிரியர் மு. நாகநாதன்.
தினமணி

நாட்டுக்குதேவை மதுக்கடைகளா மருத்துவக்கல்லூரிகளா?

புதுவை மருத்துவக் கல்லூரி பட்டமளிப்பு விழாவில் பேசிய பிரதமர் மன்மோகன்சிங் வழக்கம்போல கவலை தெரிவித்துள்ளார். 1000 பேருக்கு ஒரு மருத்துவர் இருக்கவேண்டிய நிலையில் 2000 பேருக்கு ஒரு மருத்துவரே உள்ளார் என்று குறிப்பிட்டுள்ளார். நம் தமிழகத்தில் தற்போது சிவகங்கையில் தொடங்கியுள்ள கல்லூரியையும் சேர்த்து 18 மருத்துவக்கல்லூரிகளில் 2145 மாணவர்கள் இந்த ஆண்டிலிருந்து மருத்துவக்கல்வி பயில உள்ளனர். இது நம் நாட்டுக்குப்போதுமானது அல்ல என்பது பிரதமரே ஒப்புக்கொண்ட உண்மை. மாவட்டத்திற்கு ஒரு மருத்துவக்கல்லூரியை ஏன் அரசு திறக்கக்கூடாது.
மதுக்கடைகளின் எண்ணிக்கையை அதிகரிக்கும் அரசு மருத்துவக்கல்லூரிகளின் எண்ணிக்கையை அதிகரிக்குமா?


தினமணி செய்தி

First Published : 01 Jul 2012 12:25:38 AM IST
Last Updated : 01 Jul 2012 01:20:52 AM IST

 புதுச்சேரி, ஜூன் 30: இந்தியாவில் மருத்துவக் கல்வியின் தரம் கவலை அளிக்கும் நிலையில் உள்ளதாக பிரதமர் மன்மோகன் சிங் தெரிவித்தார்.
 புதுச்சேரி ஜிப்மர் மருத்துவமனையில் ரூ.342 கோடியில் கட்டப்பட்ட குழந்தைகள், பெண்கள் மருத்துவமனை, பயிலகம், விடுதி கட்டடங்களைத் திறந்து வைத்தும், முதுகலை, இளங்கலை முடித்த 311 பேருக்குப் பட்டங்களை வழங்கியும் அவர் சனிக்கிழமை பேசியது:
 நாட்டு மக்களுக்குச் சுகாதாரத்தை அளிப்பதில் பெரும் சவால்களைச் சந்தித்து வருகிறோம். சுகாதாரக் குறியீடுகள் மோசமாகத் தொடர்வதும், சிசு மற்றும் பிரசவகால மரணங்களும் கவலையளிக்கின்றன.
 பல ஆண்டுகளாகச் சுகாதார மற்றும் குடும்ப நலத் திட்டங்களைச் செயல்படுத்தி வந்தாலும், இன்றைக்கும் மருத்துவச் செலவுகளுக்காக, 3-ல் இரு பங்குத் தொகையை மக்கள் கடன் வாங்கியே செலவிடுகின்றனர். அதிலும் மருந்துகளுக்காகவே அதிகம் செலவிட நேர்கிறது.
 இதை சரி செய்யும் நோக்கில், 7 ஆண்டுகளுக்கு முன்பு தேசிய ஊரக சுகாதாரத் திட்டம் தொடங்கப்பட்டது. இத்திட்டம் மூலம், சிசு மற்றும் பிரசவகால மரணங்கள் விகிதம் குறைந்தது. மருத்துவமனையில் நிகழும் பிரசவங்களின் எண்ணிக்கை அதிகரித்தது. மக்களின் தேவைகள் பல நிறைவேற்றப்பட்டாலும், இன்னமும் இலக்குகள் பல இருக்கின்றன.
 இதனால், தேசிய ஊரக சுகாதாரத் திட்டத்தை அடுத்த 5 ஆண்டுகளுக்கு நீட்டிக்க அரசு முடிவெடுத்திருக்கிறது. அதேபோல, நகர்ப்புற பகுதிகளில் சுகாதாரத் திட்டங்களை அமல்படுத்த, புதிய தேசிய நகர்ப்புற சுகாதாரத் திட்டம் தொடங்கும் முயற்சிகளில் அரசு ஈடுபட்டிருக்கிறது.
 நாட்டின் வடக்கு, மத்திய மற்றும் கிழக்குப் பகுதிகளின் கிராமப்புறங்களில் மருத்துவர்கள் பற்றாக்குறை இருக்கிறது. 1,000 பேருக்கு ஒரு மருத்துவர் என்பதற்குப் பதிலாக, 2 ஆயிரம் பேருக்கு ஒரு மருத்துவர் என்ற நிலை இருக்கிறது. ஒரு மருத்துவருக்கு 3 செவிலியர்கள் என்பதற்குப் பதிலாக, இரு மருத்துவர்களுக்கு 3 செவிலியர்கள் என்ற நிலையும் இருக்கிறது. இப்பிரச்னைக்குத் தீர்வுகாண, மத்திய மற்றும் மாநில அரசுகள், குறிப்பாக மாநில அரசுகள் அந்தந்தப் பகுதிகளில் இணைந்து செயல்பட வேண்டியது அவசியம்.
 மருத்துவக் கல்வியின் தரம் கவலை அளிக்கும் நிலையில் உள்ளது. மருத்துவக் கல்வி குறித்த விழிப்புணர்வு போதுமானதாக இல்லை. இந்நிலை தொடர அனுமதிக்கக்கூடாது. கல்வித்தரம் உயர்வதற்கு உதவியாக நம்பகமான கட்டுப்பாட்டு அமைப்பும், கல்விக்கூட அமைப்புகளையும் நிறுவ வேண்டியது அவசியம். அதேபோல, பாடத்திட்டத்திலும் கவனம் செலுத்த வேண்டிய தேவை இருக்கிறது.
 கிராமங்களிலும், உள்ளூர் சமுதாயத்தினரோடும் இணைந்து பணியாற்றுவதற்கேற்ப மாணவர்களைப் பயிற்றுவிக்க வேண்டும். நோய்களைக் குணப்படுத்தும் பணியைவிட, நோய்த் தடுப்புப் பணிகளில் தங்களது பங்களிப்பை அதிகம் அளித்து, சமூகப் பங்களிப்பை நிறைவேற்ற வேண்டும்.
 இந்திய மருத்துவக் கவுன்சில் எம்.பி.பி.எஸ் படிப்புக்கான பாடத்திட்டங்களை மாற்றியமைப்பதோடு, சமூக மருத்துவம் சார்ந்த பயிற்சிகளையும் அனைத்து நிலைகளிலும் இணைத்து வருகிறது.
 நாட்டின் மருத்துவக் கல்வியைப் பலப்படுத்த பல்வேறு பணிகளை மத்திய அரசு மேற்கொண்டு வருகிறது. இளநிலை, முதுகலை மருத்துவப் படிப்புகளின் எண்ணிக்கை அதிகரிக்கப்பட்டுள்ளது. புதிய மருத்துவக் கல்லூரிகளும் நாடு முழுவதும் தொடங்கப்பட்டுள்ளன.
 தேவையான இடங்களில் புதிய மருத்துவக் கல்லூரிகளை அமைக்க மத்திய சுகாதார அமைச்சகம் தேவையான ஏற்பாடுகளைச் செய்து வருகிறது.
 பிரதம மந்திரி சுவஸ்தியா சுரக்ஷா யோஜனா திட்டத்தின்கீழ், போபால், புவனேசுவரம், ஜோத்பூர், பாட்னா, ராய்ப்பூர் மற்றும் ரிஷிகேஷ் ஆகிய இடங்களில் எய்ம்ஸ் போன்ற 6 மருத்துவக் கல்லூரி, மருத்துவமனைகள் கட்டும் பணிகள் முழு வீச்சில் நடைபெறுகின்றன. இந்த மருத்துவக் கல்லூரிகள் 2012-13ம் கல்வியாண்டிலும், மருத்துவமனைகள் 2013-14ம் கல்வியாண்டு முதலும் செயல்படத் தொங்கும் என எதிர்பார்க்கிறோம்.
 கல்வி மற்றும் சுகாதாரம் உள்ளிட்ட அனைத்துத் துறைகளிலும் மேம்பாடு அடைவதற்கான திட்டத்தோடு புதுச்சேரி மாநிலம் செயல்படுகிறது. 108 ஆம்புலன்ஸ் சேவை மூலம் இலவச ஆம்புலன்ஸ் சேவையை அளித்து வருகிறது. இதற்காக புதுச்சேரி அரசைப் பாராட்டுகிறேன். நாட்டிலேயே உயர்கல்வி மற்றும் தொழில்முறை கல்வியில் சிறந்த மையமாக புதுச்சேரி மாநிலம் திகழ அனைத்து உதவிகளையும் மத்திய அரசு செய்யும். மேலும், புதுச்சேரி மாநிலத்தை சுற்றுச்சூழலுக்கு உகந்த சுற்றுலா மையமாக மேம்படுத்தத் தேவையான வாய்ப்புகளை வெளிக்கொணர, மத்திய சுற்றுலா அமைச்சகத்தோடு இணைந்து புதுச்சேரி அரசு செயல்பட வேண்டும் என்றார்.
 மத்திய சுகாதாரத்துறை அமைச்சர் குலாம்நபி ஆசாத், மத்திய இணையமைச்சர் வி.நாராயணசாமி, துணை நிலை ஆளுநர் இக்பால்சிங், முதல்வர் என்.ரங்கசாமி, மாநிலங்களவை உறுப்பினர் ப.கண்ணன், சுகாதாரத்துறைச் செயலர் பி.கே.பரதன், ஜிப்மர் தலைவர் என்.கே.கங்குலி, இயக்குநர் டி.எஸ்.ரவிக்குமார் ஆகியோர் பங்கேற்றனர்.